وينكم عنها ؟؟؟؟؟؟؟؟؟

قضيت عطلة نهاية الأسبوع بالتنقل بين الجزر الكويتية للنزهة و الحداق و بما اني مثل اي كويتي يحب الزفر و يحب الحداق زهبت الخيوط و الييم اللي كان عبارة عن خثاق و ميد ...في البداية رحنا ام المرادم و قطينا خيوطنا .. ماكو نابر ..شلنا الباورة ومشينا على الديره (البوصلة) ورحنا جزيرة قاروه.. والله طلعنا سميجات بس مو اللي في البال وكانت بصراحة خوش قوعة بس الحظ ما حالفنا ..اليوم الثاني رحنا صوب جزيرة عوهه .. و كان الحداق اوكي ترسنا الثلاجات سمج بس انا حظي الله بالخير ما صدت وايد.. بس الربع طلعوا خير ..



جزيرة كبر الكويتية

يوم الجمعة الظهر رحنا جزيرة كبر .. وآآآه يا كبر بصراحة أول مرة اشوف بشر بهالكثرة و اليخوت اشكال و أنواع و البشر اللي موجودين هناك عمري ما شفتهم بالديرة طبعا شاطئ الجزيرة متروس بشر من جميع الجنسيات و الحجاب و العباية ما تدور هناك كله بيكيني ..و الموسيقى الصاخبة على نغمات الراب طايحيله رقص هالبنات هذا غير اللي متنعزين على جنب وطايحيله شرب ..و البوس و التلملم بالجزيرة مسموح و حلال طبعا .. لا تسؤلوني عن جنسيات مرتادين الجزيرة .. من جميع انحاء العالم بما فيهم الكويت .. يعني اذا ريلج قالج بروح حداق و يوم جمعة ديري بالج
منه يمكن تكون عينه زايغة (مزحة). بسأل الداخلية وينكم عنها ؟ ولا كبر برة الديرة ؟؟ و بسأل النفوس الضعيفة
وينكم عنها ؟؟ فكونا من شركم و روحوا خربطوا هناك... اللي عجبني اكثر ان الدلافين واحنا رايحيين الجزيرة كانت
تسبح يم طرادنا شي عجيب .. و تحية لفريق الغوص الكويتي على جهوده للحفاظ على البيئة حيث تواجد على مدار الساعة حول الجزيرة

* ملاحظة اذا تبون ترجمة للكلام القديم اللي فوق مالكم الا هيفا أقصد بالكومينت