الشيخ المرحوم عبدالله السالم سنة 1942 ..طالع كشته في البر قاعد ياكل الرقي و البطيخ
يازين البساطة
منقولة الصورة من مجلة العربي

لله عليك أشلون انا في ديرة و همسك ما يجيني ....؟؟

عندما كنت في الغربة وخصوصا في شتاء 2001 في الولايات المتحدة كنت اشتاق حق الديرة وأهل الديرة وبسماعي للصوت العذب اللي كله دفى .. الفنان عبدالله الرويشد أحن أكثر و أكثر
الكلمات تقول باختصار :!؟
اذا طق المطر ورد عشب اخضر وسط حوشك .. ؟
اذا صار الورد ..جوري على غصونك...... تذكرني..؟
اذا زاد الهوى وانشدت حبالك على خيامك .. تذكرني و خلني مرة أمر على بالك....... ؟
تنكشف اسرار روحي الى من طريت اسمك....؟
والى من غرد على غصني زهر انتظارك ........تذكرني وخلني مرة امر على بالك ...... ؟

الله عليك أشلون انا في ديرة و همسك ما يجيني .... ؟
الله عليك الخاطر المجروح ينطر ضوى جيتك انا وحنيني .........؟.

طبعا الشجن والحنين كله يطري علي في البر و الخيام و الربيع واذا كنا متجمعين حول الدوه و البرد يقرص و كل واحد متلحف بالبشت أو الفروة ...يازينج يا كويت ويازين برج وبحرج ....طبعا الموضوع ماله شغل الحين بحرارة الطقس لكن احاول ابرد الأجواء العامة علشان تنسون حرارة الصيف .. وسمعت الاغنية صدفة وتذكرت الغربة .. الله يعين المتغربين سواء للدراسة أو للعلاج أو لأي ظروف أخرى ورسالتي لهم الصبر مفتاح الفرج " فاز باللذات من كان جسورا " وسلامتكم

Eagles

كان ودي اكتب شي .. عصرت المخ و تضاربت افكاري .. ومن زحمة الكلام اللي براسي ..و الحجي اللي بقلبي صار عندي بلوك في الراس و مخي قفل .. قلت اريح و اسويلي صورة ادمجها.. انشاء الله تعجبكم ..

نزهة الى معتقل الخيران .........؟؟؟؟

ابو خالد : ضيقة خلق ... يا أم خالد وين تبينا نروح في الويك اند
أ م خالد :والله كيفك يا بوخالد المكان اللي تشوفه ,,,ابو خالد : و دي اروح منتزه الخيران اشرايج ؟؟ توقعين نحصل شاليه الحين ؟؟
أم خالد :لا يا ابو خالد ما اتوقع لا زم نحجز قبل فترة ......؟؟ ابو خالد: ايه مو مشكلة نروح نزهة ونطلع بنفس اليوم بس المهم نوسع صدرنا .. اشرايج ناخذ العيايز معانا يستانسون ؟؟ أم خالد : والله فكرة حلوة ياابو خالد ...... جهزنا الأغراض وركبنا العيال ومشينا واحنا في الدرب قعدنا نتذكر ايام اوربا و المنتزهات اللي فيها و شلون راحة البال و مافي تعقيدات واذا تبي أي شاليه او غرفة بفندق تحصله بنفس اليوم وما في حارس امن مصري كل ساع ناط عليك البطاقة ... سكروا المسجل او وطوا عليه ولا ..الخ الخ . المهم وصلنا ولا عند الباب زحمة سيارات و دوريات وناس تبي تدخل مو عارفين شلون؟؟ و ثلاث نقاط تفتيش و كل واحد يشيك على شغلة اللي على البطاقة واللي على العدد واللي يسأل وين رايحين ؟؟ مادري انا وين ياي حتى الجنة مو جذي استغفر الله .. حساب وعقاب .. طبعا اضافة حق المنظر اللي شفته وجود اسلاك شائكة دار مدار المنتزه و دوريات الأمن تدور 24 ساعة و تمسك المتسللين من ابنائنا الشباب و تسلمهم حق الشرطة "" حتى المصاروة صاروا يحكمونا "" ليش ما أدري؟؟ .. الحاجز الأول : "" حارس الأمن : كم واحد ؟ قلتله العدد ... رحت الحاجز الثاني حارس الأمن : كم رقم الشاليه؟؟ قلت والله انا جاي زيارة قالي: عندك احد هنا ؟؟ قلت لا والله ابي ادش و ما عندي احد "" تحقيق "" قال: اوكي و يعد مرة ثانية . و ادفعله الفلوس حق التذاكر و يقول :الزيارة تخش يمين و توقف سيارتك وتنزل تمشي الى المكان اللي تبيه و نصكر الساعة عشرة بالليل .. طبعا انا استأذنت ادش بالسيارة لأنه معاي 2 من كبار السن رفض و سوالي سالفة.. و حنة ..ورنه.. طبعا قلت له نادلي مسؤلك ولا للأسف يجيني واحد من ربعنا يعني كويتي يقعد يعطيني محاضرة عن القوانين والأمن.. المشروعات مختارين لهم من هالضباط المتقاعدين يحسبون المنتزه معسكر او معتقل يبون يضبطون الأمن فيه طبعا هزيت راسي لا حول ولا قوة و ما ابي اضيع وناستي خذيت التذاكر وسكت ..ودشيت يمين لين وصلت البوابة الثالثة مالت المسنه.. والا حارس الأمن : " التذاكر "" عطيته التذاكر جان الهيس الأربد يطلب البطاقات المدنية لكل شخص ؟؟ انا اهني فقدت اعصابي ما خليت مسبه في الكون ما قلتها .. و الشرهة مو عليه على الناس اللي وظفته و عطته هالصلاحيات اللي مو من صلاحياته ... و قلت بلا هالمذلة شقيت التذاكر ورجعت البيت و احنا في بالنا نأجل وناستنا الي اجازة الصيف و نروح أي بلد سياحية تشجع السياحة و تعرف شلون يجذبون الناس .... بس كسروا خاطري الشباب يعاملونهم كأنهم مجرمين داشين المنتزة.......... الحمد لله والشكر ..اذا احنا عندنا هالتخلف في طريقة معاملة
الانسان شلون و متى نتغير من داخل ؟؟......لا و المشروعات يبون الناس تقعد بالصيف .؟؟؟؟؟

الجنس الثالث يغزو شوارعنا ..


"كويت 2340"

القمر الصناعي الكويتي "" جمعان 1""..؟؟؟

"كويت 2340 الجزء الثالث "

ما يصير يا بو سارة ليش جذي شاطئ عراة بالديرة و كحول و ديسكوات ليش ؟؟ قال وليش ما يصير عندنا ؟؟ يكون بعلمك حنا تبعنا سياسة الحرام بين و الحلال بين و بغينه حل حق معدلات الجريمه من اغتصاب و زنى و اطفال غير شرعيين و بعدين ما عندنا بجرايدنا كل يوم خبر اختطاف و اغتصاب و خرجت ولم تعد وكل ساع واحد سكران مسويله بلاوي ولا عندنا قضايا تهريب اظن المسألة هذه حلت وايد مشاكل كانت تصير عندنا بالأول ... اللي يبي يسوي الغلط طريجه معروف والصح هم طريجة معروف وان منعنا هالأشياء تبي تصير قصبا علينا ..قلت ايه بس مو علانية ؟؟ قال .. صدقني كل شي عالتربية و اللي يسوي هالسوالف اقلية .. طبعا انا سكت وصكرت الموضوع علامة على اني ماني راضي على الوضع المهم دش علينا واحد يعرف ابو سارة ... قال .. السلام عليكم و ردينا السلام قال.. يابو سارة ما عرفتنا على الأخ .. قال هذا بو خالد من العصر الحجري و قطها على غشمرة المهم تبادلنا الحديث و شربنا الشاي و راح جمعان و راحت سوالفه الحلوة ... سألت بو سارة ما شاء الله عليه وايد مثقف مبين عليه دكتور .. قال ..لا يبا اي دكتور انت من صجك ما تدري هذا منو قلت لا والله .. قال هذا اللي اخترع اول قمر صناعي كويتي ... جمعان 1 قلت ما شاء الله صار عندنا اقمار صناعية بعد... قلت واللي يرحم والديك شوفلي الة الزمن مالتكم ابي ارد عند اهلي انا اقعد وياك اشوي اصلع و اصير مينون ..مو معقولة الكلام اللي تقولة انا اكيد في حلم و هذا الحلم اكيد يعيش في كل واحد يتمنى الخير حق ديرته لكن اقعد من النوم اشوفه جدامي لا..لا.لا مو معقول ودني بيتنا واللي يرحم والديك .... قال خلاص راح اردك 2005 عطني وعد انك كل ما تبي تشوف الديرة بحلمك تزورني و انت عارف مكاني ... قلت مشكور يا خوي و ما قصرت بس اكيد اذا بسولف حق الناس اللي شفته بالكويت بعد 335 سنه ما راح يصدقوني و يقولون هذا مينون بس اكيد راح ارجع لك لأنه في مويضيع شاغل بال اهل الديرة و اتمنى انه ما صار .. و اذا صار واللي يرحم والديك لا تقولي ؟؟ قال شنو هالموضوع ؟؟ قلت هابين هالأيام كل واحد نعوم راح تفخ الصدر و سوى عملية يشيل فيها الذكر ويروح المحكمة ويقول ابي اصير بنت بغير اسمي هذا غير البنات المسترجلات اللي يبون يصيرون رياييل غصب ..
يا بو سارة الجنس الثالث تارسين الديرة و خوفي من المستقبل لا يعطونهم ويه ويشرعون قوانين من صالحهم ويسمحولهم بتغيير الجنس قضائيا ..لا وتكمل اذا عطوهم حقوق السياسية باجر تنزل انتخابات المجلس قائمة النواعم او الجنوس ماني عارف شنو يسمونهم ذاك الوقت و تعال فجج ..باجر يبون قوانين يتزوجون من بعض ..خوفك من ربك لا يخفس فينا من هالمعاصاي اللي قاعد تصير ......هنا امتنع ابو سارة عن الكلام و قال لا تعليق مع هزة الرأس
و هكذا انتهت رحلة ابو خالد لعام 2340

.. شاطئ عراة الدوحة...

"" الجزء الثاني كويت 2340 ""

قعدنا مع بعض داخل و دخت من صخب الموسيقى و الناس اللي داخل و اللوية اللي مسوينها طلبت منه ان نقعد بقهوة خارج الديسكو ونكمل موضوعنا ...وصلنا القهوة ..... وفتحت الموضوع قلت ماتعرفنا على اسمك يا خوي ؟؟ قال معاك بو سارة وانا كنت عضو مجلس البلدي لفترتين و مرشح للمرة الثالثة .. قلت له بالتوفيج و اتمنى لك الخير قالي وانت ؟؟ قلت ايييه انا قصتي طويلة لاني من زمنكم ولا من عمركم نمت و قعدت من النوم جني في حلم لقيت كل شي من حولي متغير .. اشتقت حق اهلي اكيد الحين يحاتوني انا يايك من سنة 2005 ؟؟ قالي لا تحاتي راح ترد ان شاء الله زمانك والسفر بين الأزمان عادي عندنا الة الزمن و ممكن في اي وقت تقدر ترجع ,هذا بفضل التكنلوجية و العبقرية الكويتية التي هي الأفضل بالعالم ؟؟!! انا انصدمت من الكلام ..قالي خلال ال150 سنة اللي فاتت طرأ تغيير تدريجي في البنية التحتية للكويت و صاروا اعضاء مجلس الأمة و البلدي يشرعون قوانين من صالح تطور البلاد و ما قصروا الحكومه دعموا هذه القوانين !! قلت اشلون؟؟ قال: صار اول شي انفتاح اقتصادي على العالم و مافي شئ يوقف او عقبات جدام اي مستثمر مواطن او اجنبي و تحولت الديرة من مؤسسات حكومية الى قطاع خاص ... قلت حلو وبعد ؟؟ قال تم تشريع قوانين صارمة ضد الفساد الاداري في الدوائر الحكومية و مكافحة الواسطة و تم تطبيق القوانين على اساس انها تمشي على الكل و مافي احد احسن من احد ... تطور عندنا التعليم وصار عندنا طاقات هائلة من الناس العباقرة اللي اخترعوا حق العالم تكنلوجيا جديدة اللي اليابان ما تنافسنا صارت السيارات و الطائرات و كل شئ يمشي على ماء البحر حتى الطاقة استعملنا الطاقة الشمسية كوسيلة لتوليد الكهرباء و في عملية تنقية المياه خصوصا بعد نضوب النفط ؟؟؟!! قلت شنو خلص النفط ؟؟ قال اي نفط ؟؟ والله قديم انت احنى صادراتنا الرئيسية و اقتصادنا قايم على التجارة الحرة و التكنلوجيا وماكو شئ بالعالم اسمه نفط ؟؟ قلت وبعد.... قال المجلس البلدي و بلدية الكويت وضعت خطة بحيث تصبح البلاد اجمل دولة في العالم من ناحية العمران و التطور ..و الهيئة العامة للزراعه تبنت مشاريع الشباب في تطوير الزراعة حتى صرنا نصدر جميع انواع الفواكه و القمح و الرز الى جميع الدول في العالم .. قلت عجيب ؟؟ قال وبعد وضعت قوانين تحمي البيئة و سوينا وزارة خاصة لمتابعة الامور المتعلقة بالبيئة و صارت الكويت انظف بيئة في العالم بر و بحر وجو ... و على مستوى الصحة والعلاج نحن نصدر علمنا الى الغرب وساعدنا في اختراع علاج لمرضى السرطان والايدز ..قلت وبعد شنو ما قلته ؟؟ قال هذه الايجابيات بس الحين عندنا مشاكل جانبية مثل موضوع الشواطئ بما ان المرأة لها حقوق النواب المحافظين و الناشطين في مجال حقوق المرأة قاعدين يطالبون بان يكون شاطئ عراة الدوحة للعائلات فقط .!!..... قلت حتى بزمنكم ما خلصتوا من هذه المشكلة ؟؟ قال شنسوي يبون ياخذون راحتهم الحريم و ما يبون شباب ..يا عايلة يا لأ ... وللحديث بقية كويت 2340..

السهرة اليوم في ديسكو المرقاب
..
" الجزء الأول "

قعدت اليوم من النوم و حايشني صداع راس قلت ابي اروح ستار باكس اخذ قهوتي المفضلة و ارجع البيت نزلت السيارة و مشيت في الشارع والا الشوارع متغيرة علي .. مشيت الحق لافتات الشوارع الى مدينة الكويت وشنو اشوف ذيج الناطحات السحاب اللي واصلة دور ا200 و فوق و هالزراعة و النظام حتى الناس و ملابسهم تغيروا علي شفت واحد يمشي في الشارع جان اوقف اسأله وين طريج السالمية ؟؟؟ قالي اي سالمية انت مينون ؟؟ قلت له انت اللي مينون احد ما يعرف السالمية ؟؟ ما اكو الا هي بالديرة حتى اللي ماشاف الكويت يعرفها ؟؟ تدري اشلون وين طريجك اوصلك ؟؟ قالي لا انا بروح بالآندر قراوند ( القطار ) قلت اي قطار تعال زين المهم صعد معاي جان نتبادل الحديث قالي انا انشاء الله مرشح حق انتخابات البلدي 2340 ...!!! قلت : الحمدلله و الشكر مو صاحي انت مينون ولا شفيك اكو مرشح يمشي بالشارع لا ويركب اندر جراوند و بعدين احنا تونا 2005 وين وصلت 2340 قالي لا ياخوي الظاهر انت اللي مينون امش معاي و انا اثبتلك وعزمني على قهوة .. صفطنا السيارة و نزلت معاه في الأندر جراوند ومشينا مسافة 5 دقايق و الا احنا في المرقاب اشوف والا شي عجيب ولا في الحلم ذيك الناطحات و المباني و شارع زحمة ناس كتف ابكتف قلت له احنا وين؟؟!! قالي هذه المرقاب سيتي يا خوي و مشهورة باكبر مكاتب العالم التجارية و مركز مدينة الكويت لا فيها بعد احلى نايت لايف في العالم!! قلت عجيييييييييييييب!! قال ها عيل فيها الديسكوات و الحانات و الكازينوهات ..قلت له وانت ما تستحي يايبني اهني ؟؟؟ قالي انت اللي مينون ؟؟ العالم يدفعون ملايين الدنانير علشان يجون اهني ؟؟ وانت تقول ليش يايبني ؟؟؟ المهم واحنى نمشي جان يوقف و قالي بس وصلنا ؟؟ والا لافته كبيرة مكتوب عليها "" ديسكو المرقاب"" عند الباب والا اثنين مصاكة فتشونا وطلع صاحبنا نوط اول مرة اشوفة و عليه صفرين عطاه بغشيش حق البودي جارد قلت له انت اش معطيه ؟؟؟ قالي كلها 100 دينار ؟؟ قلت انت مينون هذه فيها ماجلة بيت !!! قالي لا الظاهر انت مو صاحي هذه ما تعشيك ابمطعم ؟؟ المهم دشينا والا العالم شي غريب و عجيب.... و للحديث بقية كويت 2340

WHY THEY WANT TO KILL AS ??

فقط يجب ان تفخر

هذه الصورة ليست مركبة او من تأليف انما هي واقع نعيشه في حياتنا انها كتبت على احد الابواب في منطقة من مناطق العالم هذا هو الارهاب و ما جناه على سمعة الامة العربية والاسلامية ان ديننا دين التسامح و العفة لا يدعو الى القتل و الترهيب و التشريد ... نحن نجني اليوم ما زرعه الارهاب من كره و حقد و غل على شعوبنا العربية و الاسلامية ..... ها استانستوا الحين يا ربع بن لادن هذا هو الدين في نظركم ؟؟؟؟؟؟؟ حسبنا الله و نعم الوكيل لا حول ولا قوة الا بالله

ANIMALS MAN

الرجل الحيوان

هكذا لفت انتباهي كتاب للدكتورة الكويتية فوزية الدريع .. ولو اخذت عنوان الكتاب و قعدت تفسره بينك و بين نفسك لوجدت ان المرأة اخذت حقوقها الكاملة و تعدت .. بصراحة انبطت جبدي من عنوان الكتاب .. لكن هذه سياسه من قبل الناشر لترويج الكتاب بهذا المانشيت العريض (الرجل الحيوان) الموضوع داخل الكتاب وجدته جذابا بصراحة و الحريم المظلومين يجدون فيه منفس لهم خصوصا لفهم ازواجهم و كيفيه التعامل مع كل شخصية مثلا هناك الرجل البعير هو شخصية الرجل الصبور بما ان البعير يتحمل المشاق ويصبر عليها ...و هنا شخصية اضحكتني وهو شخصية الرجل الثور و هو الرجل ذو الاشباعات بكافة صورها مثل الجنس والطعام و هو رجل محب للفن والموسيقى
الرجل الفيل : رجل في خفة الدم والبساطة وغاية في الظرف
الرجل الخروف : هو الرجل التابع ينقاد و بتبعية اي شخص
الرجل التمساح : هو الرجل الذي يتبع نظرية الغاية تبرر الوسيلة
وهناك الكثير من الشخصيات في الرجال مثل الرجل القرد و الذئب و السنجاب و الدلفين الخ .... ( الله يستر) الكاتبة رمزت لكل رجل صفاته حسب ما يتطبع فيها كل حيوان و رمزت الشخصية الا انه واقع . ياترى بماذا نستطيع ان نشبه المرأه ؟؟؟ انا عن نفسي اشبهها بالزهور فهناك الوان مختلفة للزهور و كل لون يرمز الى شئ معين مثل االون الأحمر هذه المرأة الرومانسية التي تمشي وتحب خخخخ
و الزهور انواع شئ رائحة زكية و شئ بدون رائحة
والزهور بأشواك و بدون اشواك .. طبعا المرأه الزهرة بالاشواك وخر عنها لا يحوشك هذه شرية وتحب المشاكل و النجرة
المرأة في حياة الرجل مهما تلونت الوانها او اختلفت اشكالها الا انها تبقى دوما زهرة الحياة مهما كان نوع هذه الزهرة

يبقى شؤال واحد ياترى زوجك الرجل من اي شخصية حيوان ؟؟؟ و زوجتك المرأه اي نوع من الزهور ....

اسم الكتاب : الرجل الحيوان (تعرفي على سلوك زوجك لكي تعيشي بسلام) للدكتورة فوزية الدريع النهاية...خخخخخ

سيف العرب ... سيف الوصاخة و الجرب
هذا جزاة كل طاغية ظلم و قتل و شرد شعوب.
اول ما صادوه مثل الجرذي منخش بحفرة و الحين
قاعد يغسل هدومه المعفنة بكل ذل و هو بالملابس الداخلية و بعد نبي نشوف اكثر واكثر

SADDAM KING OF DIRTS

ART

EAGLE'S ATTACK

Eagle wings have several adaptations for the eagle's fishing life.
Shape: Long, broad wings like an eagle's take a lot of energy to flap, but are wonderful for riding effortlessly on thermals. Like all birds, eagles must minimize the energy they need for flight over long distances.
"Fingers" or slotted primaries: This provides more lift with less weight--important for birds that ride thermals
Size: Eagle wings are big enough to carry the weight of the eagle PLUS the weight of a fairly large fish. And if the fish is too heavy to pull out of the water, the eagle can use its long wings to paddle to shore!
Color: The pigment that makes an eagle's wing feathers black also makes those feathers stronger, which is important when feathers hit the water while fishing and when flying.

http://www.learner.org/jnorth/images/graphics/d-e/EagleAdaptationsWing.gif

jabber al sabah

MY DREEM AFTER RETIARED

حلم التقاعد
كل واحد فينا عنده طموح في مجال عملة يبي يوصل اعلى المراتب والمراكز لكن لا بد راح يجي يوم و يتقاعد و يصير ماعنده سالفة الا مناجر العيال و العجوز المسكينه أو يحط حيله بالخادم او الخادمة هذا طبعا اذا كان الشخص بطالي لا شغل ولا مشغلة ... احسن شي يشوف له مشيريع صغير يسترزق الله منه و يقضي وقت فراغه
اما بالنسبة لي انا مخطط تخطيط حلو وزين حق بعد التقاعد اخذ ام العيال العزيزة و الف فيها العالم من جزيرة الى جزيرة ما نخلي في نفسنا ولا بخاطرنا شي قبل لا نفنقش و على هالأساس قررنا نشتري يخت طول بعرض يعني يخت عود و طبعا احطلي صبيان و خدم فيه علشان يعينوني .. و طبعا انا النوخذة و ام العيال اشغلها مرة سكوني ومرة الطباخ ... "مزحة" و بعدين نلف العالم كله اذا الله عطانا عمر ..

skeleton

cool

دمج الصور
في برامج وايد بسيطة و سهلة تسهل عملية اللعب في الصورة و التعديل عليها
و انا اخترت الصورة اللي فوق لدمجها وللأمانه الفكرية انا ما صورت هذه الصور .. منزلها من النت و دمجتها ولكم الراي ............
على فكرة التصوير و الرسم الفن عموما يدل على الذوق الراقي و الرفيع للشخص
عموم الهوايات جميلة مالم تضر الشخص

ABDULLAH AL SALEM

رحمة الله عليك

رحمة الله عليك .. و يغمد روحك الجنة ..
في عهده نالت الكويت استقلالها و كتب الدستور الكويتي واليوم
نقطف اخر ثمارها باعطاء المرأة كامل حقوقها السياسية ... و انا شخصيا اتمنى اشوف اول وزيرة و أول عضوة كويتية لتشارك في بنيان المجتمع و تساهم كل المساهمة في تعزيز السلطة التشريعية و التنفيذية بقراراتها
و بسنا ملينا من الهواش و المناجر داخل المجلس نبي نشوف طاقات جديدة ....

مبروك للكويت و أهل الكويت و مبروك لك يا بو مبارك وتحققت رغبتك السامية
و خل هذولي اللي تهمهم مصالحهم الشخصية يفيدهم تصويتهم ضد المرأة
انتخابات 2007 راح تنفضهم نفاض و الشعب عرف منو اللي يوقف معاه

البحر ... احنا اهل الكويت خصوصا لنا علاقة حميمه تربطنا مع البحر
بحكم ان الديرة تطل على البحر و ابائنا و أجدادنا اشتغلوا على صيد الأسماك و الغوص على اللؤلؤ في مواقع الغوص الي يسمونها بهيرات الغوص و كانو يطلعون اول الصيف لمدة 4 شهور الى موسم القفال كانت حياة شاقة و صعبة و فيها كفاح يازينهم و يازين حياتهم .

WHEN WAVES TALK .....